Henry Miller

Dr Henry Valentine Miller (* 26. Dezämber 1891 in Nöi York; † 7. Juni 1980 z Los Angeles) isch en amerikanische Schriftsteller und Mooler gsi.

Si Wärk isch fast usschliesslig in dr Form von ere Autobiografii oder Daagebuech gschriibe und zäigt si Gfüüls- und Gedankewält, wo mänggisch surreal aamuetet. Im Miller sini Schrifte si seer gsellschaftskritisch und psüchoanalütisch. Die verschiidenste Charakter, wo mä in sine Büecher cha finde, häi en unverkennbaari Füsiognomii, wo si drmit s Lääbe mäistere oder draa schitere. Dr Miller het sälber gsäit, ass er s Lääbe äso well darstelle, wien er s erläbt het, und ass er e künstligi Stilisierig häig welle vermiide. Sini Beschriibige vo dr Sexualidäät, wo bewusst provozierend-realistisch si, si Däil gsi vo sine Besträäbige, s bürgerlige Wärtsüsteem, won er as verlooge und falsch empfunde het, z entlarve und dur en Individualismus z ersetze, wo nüchtern und glichzitig poetisch isch.

Dr Miller isch äine vo de bedütendste Schriftsteller vom 20. Joorhundert, het mit siner provokante Sprooch und siner nonkonformistische Haltig und Lääbenswiis vili Autoore vo dr Biit Dschenereischn und vom sogenannte Postmodernismus beiiflusst, wo wien är d Wärt vo dr Middelschichtsgsellschaft verachdet häi. Bekannti Verdräter vo dr Biit Dschenereischn si under anderem d Schriftsteller Jack Kerouac (1922–1969) und Allen Ginsberg (1926–1997) gsi.